الموضوع كاملا للأمانة منقول من أحد المواقع والذي بدوره نقله من موقع آخر وعذرا لصاحب الموضوع الأصلي و أرجو أن
يكون في ميزان حسناته لأنه موضوع ذي فائدة كبيرة
السلام عليكم ورحمة الله وبركاته
الأخوة والأخوات الأفاضل من خلال تجربتى فى تصفح منتديات البيع الخاصة بالسيارات وجدت الكثير من السلبيات بحيث تعطل عملية البيع أو تنفر المشترى او على اقل تقدير الموضوع مايكونش فيه معلومات كفايه عن السيارة المعروضه مما يفتح مجالا واسعا للأسئله والإستفسارات ووجع دماغ انت فى غنى عنها المهم من خلال تجربتى الشخصية وتجارب بعض الاصدقاء المقربين اقدر اقولكم ازاى تعرض عربيتك بطريقة صحيحة
ثانيا - لازم تصور العربية - ولو ماعندكش كاميرا استلف واحده او روح صورها عند اقرب ستوديو تصوير ب 10 جنيه وخد الصور على فلاشه - صور العربيه فى غايه الاهميه موضوع بيع من غير صور= لاشئ
ثالثا - اذكر مميزات العربيه بطريقة شيك ومن غير مبالغه ومفيش داعى للكلام اللى من نوعيه الوحيده فى مصر وسعر لقطه وشاذة والكلام ده
رابعا - اعلن فى موضوعك ان اى استفسار هايكون على العام ومفيش داعى لموضوع الرسائل الخاصة
خامسا -بالنسبه للسعر حاول تحط سعر متوافق مع سعر السوق ولا اعلى فالناس تتهكم عليك ولا قليل فيقلقوا من العربيه - ممكن تعرف سعر السوق من الجرايد ومواقع الانترنت
سادسا - مفيش حاجه اسمها السعر نهائى - الكلمة دى بتعفرت المصريين - لاننا متعودين على الفصال ولو اشترينا حاجه بنفس السعر اللى البائع بيقوله بنحس اننا اتضحك علينا - فممكن تزود الف او الفين بالكتير عن السعر اللى انت عايزه
سابعا - وضح العربيه مرور ايه وفيها رخصة قد ايه وفيها عقد بيع والا توكيل (الكلام ده مهم جدا) عشان بيعمل مشاكل بعد كده
ثامنا - حدد ميعاد للإتصال (بعد الساعة خمسة مساءا مثلا ) لان فى ناس بتتصل فى اوقات غريبه
تاسعا - تابع موضوعك باستمرار وماتكسلش ترد على الاستفسارات
عاشرا - لو حد قالك تعالى بالعربيه او نتقابل فى مكان اعتذرة بشياكة وقوله يشرفك ويجى يشوف العربيه عندك (مفيش عروسه بتروح للعريس)
حادى عشر - حاول تصلح كل مشاكل العربيه مع قرار البيع وماتقولش مش مهم مانا هابيعها - لان اى مشكله فى العربيه حتى لو لمبه محروقه من ام 3 جنيه بتقلل من سعر السيارة
ثانى عشر - لو حد كلمك وعايز يشوف العربيه ماينفعش طبعا يجى يلاقيها متبهدله فانت بمجرد اخذ قرار البيع اهتم بنظافه العربيه واغسلها كويس فوق وتحت وبره وجوه وماتخليش حاجه مرميه فى العربيه ولا الشنطة ولو فيها حاجات حاول ترصها بانتظام ويستحسن تغير زيت علشان اللى هايشترى يعرف انك مهتم بالعربيه (والله يا جماعة الكلام ده بيفرق كتير مع الشارى)
واخيرا لو فيه عيب ملحقتش او مقدرتش تعمله قوله للى هايشترى بمنتهى الوضوح والامانه لما يجى يعاين العربيه او فى التليفون واتق الله فى بيعك فقد روى البخاري ومسلم عن حكيم بن حزام رضي الله عنه، عن النبي صلى الله عليه وسلم قال: البيعان بالخيار ما لم يتفرقا، فإن صدقا وبينا بورك لهما في بيعهما، وإن كذبا وكتما محقت بركة بيعهما. ( الْبَيِّعَانِ : البائعُ والمشتري )
منقول من هذا الرابط
نصائح غالية
تعليقات
إرسال تعليق